بەپێی ڕاگەیاندنی بەشی پەیوەندییە گشتییەکانی زانکۆی کوردستان، ئەندامانی دەستەی زانستیی بەشی ئەندازیاریی میکانیک بە ئامادەبوون لە کۆمەڵگەی پیشەسازیی تایەی بارز، قۆناغێکی نوێیان لە کارلێکی زانستی و پیشەسازی دەست پێ کرد. ئەم سەردانە بە مەبەستی تاوتوێکردنی توانستە هاوبەشەکان و زەمینەسازی بۆ هاوکاریی بەردەوام ئەنجام درا.

لەم کۆبوونەوە پسپۆڕانەیەدا، چەندین تەوەر بۆ هاوکاری خرانە بەر باس و ڕێککەوتنی سەرەتاییان لەسەر کرا، کە گرنگترینیان لە دوو بواری توێژینەوە و تەکنەلۆژیا و تواناسازیی قوتابیاندا چڕ بوونەوە:

١. هاوکاریی توێژینەوەیی و تەکنەلۆژی:
جێبەجێکردنی پڕۆژەی توێژینەوەی هاوبەش، کەڵکوەرگرتن لە هەلی خوێندنی پیشەیی (فرصت مطالعاتی)ی ئەندامانی دەستەی زانستی لە کەرتی پیشەسازیدا، سوودوەرگرتن لە توانای باجی کەمکراوەی توێژینەوە و تەکنەلۆژیا، و پشتیوانیی تایبەت لە نامەی دەرچوونی خوێندنی باڵا کە پەیوەست بن بە پێداویستییەکانی پیشەسازیی تایەوە.

٢. تواناسازیی قوتابیان و ئاڵوگۆڕی زانست:
ڕەخساندنی هەلی ڕاهێنانی ئامانجدار بۆ قوتابیان، پێدانی سکۆلارشیپ بە قوتابییە یەکەمەکانی قۆناغی بەکالۆریۆس، بەڕێوەبردنی خولی بەرزکردنەوەی کارامەیی، و سازکردنی سیمیناری پسپۆڕانە لەلایەن ئەندازیارە دیارەکانی کۆمپانیای بارزەوە لە زانکۆدا، بە مەبەستی گواستنەوەی زانستی تەکنیکی و ئەزموونە کردارییەکان.

واژۆکردنی لێکتێگەیشتنامەیەکی گشتگیر لە کارنامەدایە
لە کۆتاییی کۆبوونەوەکەدا، هەردوولا جەختیان لەسەر پێویستیی داڕشتن و واژۆکردنی لێکتێگەیشتنامەیەکی گشتگیر کردەوە بە مەبەستی جێبەجێکردنی ئەو تەوەرانەی کە ڕێککەوتنیان لەسەر کرابوو. هەر لەم چوارچێوەیەدا، بەڕێوەبەری پەیوەندی لەگەڵ پیشەسازی و کۆمەڵگەی زانکۆی کوردستان، بانگهێشتی بەڕێوەبەرە باڵاکانی کۆمپانیای بارزی کرد بۆ ئامادەبوون لە زانکۆ و درێژەدان بە گفتوگۆکان لە ئاستێکی باڵاتردا.