دکتۆر هێمن گوڵپیرا، وەک توێژەری گەنجی دیاری گرووپی زانستە ئەندازیارییەکانی فەرهەنگستانی زانستی ئێران ناسێندرا.

بەپێی ڕاپۆرتی پەیوەندییە گشتییەکانی زانکۆی کوردستان، لە بیست و یەکەمین ڕێوڕەسمی ڕێزلێنان لە ڕۆژی ئەندازیاری و بەرزڕاگرتنی هەڵبژێردراوان کە لەلایەن فەرهەنگستانی زانستی کۆماری ئیسلامیی ئێرانەوە بەڕێوە دەچێت، ڕێز لە دکتۆر هێمن گوڵپیرا، ئەندامی دەستەی زانستیی زانکۆی کوردستان، وەک "توێژەری گەنجی دیاری هەڵبژێردراوی گرووپی زانستە ئەندازیارییەکان" دەگیرێت.

ئەم ڕێوڕەسمە کە ساڵانە هاوکات لەگەڵ ڕۆژی بەرزڕاگرتنی خواجە نەسیرەدینی تووسی (٥ی ڕەشەمە) وەک ڕۆژی ئەندازیاری بەڕێوە دەچێت، بەرزترین پێگەی نیشتمانییە بۆ ڕێزلێنان لە مامۆستایانی پێشەنگ، ئەندازیارانی نموونەیی و توێژەرانی گەنجی بلیمەت. هەڵبژاردنی براوەکانی ئەم ڕێوڕەسمە دوای لێکۆڵینەوەی وردی دۆسیە زانستییەکان لەلایەن گرووپە پسپۆڕییەکانی فەرهەنگستانی زانستەوە ئەنجام دەدرێت. هەڵبژاردنی دکتۆر گوڵپیرا بۆ ئەم نازناوە، نەک هەر نیشاندەری کوالێتی بەرز، داهێنان و کاریگەریی توێژینەوەکانی ناوبراوە لە بواری زانستە ئەندازیارییەکاندا، بەڵکوو جێگەی شانازی و سەربەرزیی زانکۆی کوردستان و کۆمەڵگەی زانستیی پارێزگاکەیە. ئەم سەرکەوتنە ڕەنگدانەوەی ئیرادە و هەوڵی بێوچانی ئەندامانی دەستەی زانستیی گەنجی زانکۆی کوردستانە لە سنوورەکانی زانست و تەکنەلۆژیادا.